Agjencia Kombëtare e Pyjeve është shndërruar në hapësirë të veçantë ekspozuese, duke mirëpritur ekspozitën “Expoforest 2026”, një iniciativë që sjell në vëmendje pasurinë dhe historinë e fondit pyjor në vend.

Ministri i Mjedisit, Sofjan Jaupaj e cilësoi ekspozitën si një ngjarje me ndikim të rëndësishëm në zhvillimin e sektorit pyjor, si dhe në rritjen e ndërgjegjësimit për mbrojtjen dhe menaxhimin e qëndrueshëm të pyjeve.

E hapur për publikun deri më 31 mars, ekspozita prezanton një koleksion të pasur dokumentesh, studimesh dhe të dhënash të përditësuara mbi fondin pyjor, të hartuara ndër vite nga ish Instituti i Pyjeve dhe Kullotave.

Ky është viti i dytë i organizimit të kësaj ekspozite, që zhvillohet në kuadër të Ditës Ndërkombëtare të Pyjeve, që është më 21 mars. Në këtë edicion promovohen të gjitha veprimtaritë e Agjencive dhe projekteve të linjës që zhvillohen në vendin tonë për ripërtëritjen dhe zhvillimin e sektorit të pyjeve. Ndërsa vend të rëndësishëm zë edhe prezantimi i aparaturave dhe mjeteve bashkëkohore që përdoren sot për matjen e treguesve të ndryshme të pyjeve.

Vizitorët kanë mundësinë të njihen nga afër edhe me instrumente historike të përdorura për matjet pyjore, si dhe me materiale arkivore me vlerë të veçantë, të cilat dëshmojnë përkushtimin ndër vite në ruajtjen dhe menaxhimin e qëndrueshëm të pasurisë pyjore në Shqipëri.

Burimi ATSH