Presidenti Bajram Begaj zhvilloi një vizitë në Selinë e Shenjtë të Kryegjyshatës Botërore Bektashiane, ku përcolli urimet e tij me rastin e festës së Sulltan Nevruzit.

Kreu i Shtetit u prit nga Kryegjyshi Botëror, Haxhi Dede Baba Edmond Brahimaj.

Begaj theksoi rëndësinë e kësaj dite si një simbol i shpresës, harmonisë dhe mirëkuptimit për të gjithë shoqërinë shqiptare.

Ai uroi që kjo festë të shërbejë si një thirrje për më shumë paqe, begati dhe bashkëjetesë mes qytetarëve.

“Gëzuar Sulltan Nevruzin! Jam këtu, së bashku me Baba Edmond Brahimaj, për t’u uruar këtë festë të gjithë besimtarëve bektashinj dhe mbarë shqiptarëve, me dëshirën për paqe, lumturi dhe mirëqenie në jetën e tyre”, u shpreh Presidenti.

Sulltan Nevruzi përkon me ditëlindjen e Imam Aliut dhe përfaqëson vlera universale që duhet të mishërohen në përditshmërinë e shoqërisë, si paqja, dashuria, solidariteti dhe besimi për një të ardhme më të mirë.

Kjo festë simbolizon gjithashtu lindjen e pranverës dhe të shpresës.

“Sulltan Nevruzi përkon me ditëlindjen e Imam Aliut dhe vlerat e tij duhet të mishërohen në jetën tonë të përditshme. Sulltan Nevruzi është lindja e pranverës, lindja e shpresës, lindja e dritës mbi errësirën, dhe duhet që vlerat e larta të kësaj dite, të paqes, të dhembshurisë, te dashurisë, të solidaritetit dhe të besimit për një të ardhme më të mirë, të jenë ato që duhet të na përçojnë në të gjitha ditët tona të vitit!”, deklaroi Presidenti nga Selia e Shenjtë e Kryegjyshatës Botërore Bektashiane.

Marrë nga ATSH