Igli Tafa u prezantua sot në krye të Agjencisë Kombëtare të Shoqërisë së Informacionit (AKShI).

Në aktivitetin ku të pranishëm ishin kryeministri Edi Rama, ministrja e Ekonomisë dhe Inovacionit, Delina Ibrahimaj dhe një pjesë e stafit të AKShI-t, Tafa u shpreh se e konsideron një përgjegjësi të jashtëzakonshme drejtimin e këtij institucioni, si një institucion të suksesshëm që nuk është vetëm teknologjik, por zemra e modernizimit dhe transformimit digjital.

Tafa tha se AKShI është një institucion që ofron shërbime për gjithë qytetarët dhe bizneset e vendit, si hallka kryesore e bashkëpunimit me gjithë institucionet e tjera në sektorin publik dhe privat.

“Kjo është një përgjegjësi e jashtëzakonshme për mua”, tha Tafa.

Në një mesazh drejtuar stafit të AKShI-t, Tafa tha se ata janë fuqia dhe forca reale që ka bërë të mundur transformimin, ndërsa theksoi se do të punohet për ta çuar më para vizionin e Kryeministrit Rama për modernizimin dhe digjitalizimin e shërbimeve drejt bizneseve dhe qytetarëve.

Ndërsa, në një mesazh drejtuar qytetarëve, Tafa nënvizoi se AKShI do të bëjë maksimumin për të ofruar shërbime gjithnjë e më të qëndrueshme, ndërsa do të punohet për shërbimet në e-Albania 2.0 apo avancimi i teknologjive IA për të bërë të mundur Shqipëria të jetë lider jo vetëm në rajon, por dhe më gjerë.

Burimi ATSH