Inspektorati i Përgjithshëm nuk do të jetë më në varësi të Kryeministrisë, por do të menaxhohet nga Ministria e Ekonomisë dhe Inovacionit.

Ministria e Ekonomisë dhe Inovacionit nxori për konsultim publik ndryshimet në ligjin “Për inspektimin në Republikën e Shqipërisë”.

Ndryshimet synojnë të përmirësojnë koordinimin dhe efikasitetin e veprimtarive inspektuese, të mbështesin zhvillimin ekonomik dhe të rrisin mbrojtjen e konsumatorit.

Ndryshimet vijnë pas gjetjeve të raportit SIGMA të vitit 2025, i cili theksoi nevojën për të forcuar qendrën e qeverisjes dhe për të përmirësuar koordinimin ndërinstitucional në vend.

Raporti vuri në dukje se në Shqipëri shumë autoritete dhe agjenci raportojnë drejtpërdrejt te Kryeministri, duke krijuar një strukturë tepër të centralizuar.

Si pjesë e rekomandimeve, u sugjerua që disa institucione, përfshirë Inspektoratin e Përgjithshëm, të kalojnë në varësi të ministrive përkatëse sipas fushës së veprimtarisë.

Nga zbatimi i k[tyre ndryshimeve nuk parashikohen kosto shtesë për buxhetin e shtetit.

Pr.ligji është hartuar në bazë të rekomandimeve ndërkombëtare të SIGMA-s, duke u mbështetur në angazhimin dhe bashkëpunimin e institucioneve përkatëse.

Ky ndryshim pritet të rrisë koherencën e politikave, të përmirësojë funksionimin e tregut dhe të ndihmojë vendin në procesin e përgatitjes për anëtarësimin në Bashkimin Evropian.

Marrë nga ATSH