Korpusi i ri i laboratorëve të Institutit të Shëndetit Publik, një investim i Qeverisë shqiptare pritet të trefishojë kapacitetet laboratorike të këtij institucioni, me biosiguri sipas standardeve të BE-së.

Ky korpus është ndërtuar në një sipërfaqe prej 2900 metrash katrorë dhe është i ndarë në pesë kate, një nëntokësor dhe katër kate mbi tokë. Në këtë korpus, trajtimi i agjentëve biologjikë me rrezik të lartë do të bëhet në nivele të larta mbrojtjeje për shëndetin e specialistëve.

Ministrja e Shëndetësisë dhe Mirëqenies Sociale, Evis Sala, e shoqëruar edhe nga drejtorja e Institutit të Shëndetit Publik (IShP), Dorina Çanaku inspektoi ambientet e korpusit të ri të laboratorëve të IShP-së.

Korpusi i ri i Laboratorëve Referencë Kombëtare të IShP-së, një investim strategjik kombëtar pritet të vihet në funksion këtë vit dhe do të krijojë një nga kapacitetet laboratorike më moderne në rajon.

Drejtorja e IShP tha se korpusi ofron teknologji të avancuar dhe dy laboratorë të nivelit të lartë të biosigurisë, që forcon diagnostikimin, kërkimin shkencor dhe gatishmërinë e vendit ndaj çdo emergjence shëndetësore

“Ky laborator do të shërbejë si një qendër kombëtare për referencën, ekspertizën dhe kërkimin shkencor në fushën e shëndetit publik. Është një investim i Qeverisë shqiptare mbështetur nga MShMS dhe do të shërbejë në përmirësimin e parandalimit, zbulimit të hershëm dhe kontrollit të sëmundjeve infektive”, tha Çanaku.

Sipas Çanakut, ky korpus do të ketë dy laboratorë të nivelit të lartë të biosigurisë ku do të punohet në kushte të larta sigurie për punonjësit, ndërkohë që në IShP, në godinën ekzistuese është vetëm një laborator i nivelit të dytë.

Korpusi i ri do të përfshijë gjithashtu laboratorë të specializuar për sëmundjet infektive emergjente dhe riemergjente, HIV/AIDS, hepatitet, IST-të, biologjinë molekulare, mikrobiologjinë, sigurinë ushqimore dhe monitorimin mjedisor, duke mbështetur programet kombëtare të depistimit dhe forcimin e sigurisë shëndetësore në vend.

Rritja e kapaciteteve laboratorike të Institutit të Shëndetit Publik ka një ndikim të drejtpërdrejtë dhe shumë të rëndësishëm në shëndetin publik. Numri i analizave që mund të kryhen në vit mund të kalojë nivelin e 30.000-35.000 ekzaminime në periudha normale/të qeta.

Me këtë korpus të ri laboratorik, IShP hedh një hap cilësor drejt rritjes së kapaciteteve diagnostikuese dhe kërkimore në nivel kombëtar, duke forcuar rolin e tij si pikë referimi për mbrojtjen e shëndetit të qytetarëve dhe përballimin në kohë të çdo situate që cenon sigurinë shëndetësore të vendit.

Marrë nga ATSH