Ministri i Drejtësisë, Besfort Lamallari priti sot në një takim drejtorin e përgjithshëm të Komisionit Evropian për Negociatat e Fqinjësisë dhe Zgjerimit, Gert Jan Koopman.

Përmes një postimi në rrjetet sociale, Lamallari theksoi se gjatë takimit “patëm një diskutim shumë të mirë mbi progresin e bërë nga Shqipëria në zbatimin e reformave kyçe në sektorin e drejtësisë, si dhe në tërësi mbi Kapitullin 23: “Gjyqësori dhe të Drejtat Themelore””.

Lamallari bëri të ditur se e njohu Koopman-in me procesin gjithëpërfshirës dhe transparent të konsultimit të draftit për Kodin e ri Penal me të gjitha institucionet dhe grupet e interesit, si dhe punën paraprake për amendimin e Kodit të Procedurës Penale, duke synuar harmonizimin sa më të plotë të tij me standardet dhe përcaktimet ligjore.

“Vijojmë njëkohësisht me forcimin e kapaciteteve tona institucionale dhe bashkëpunimin me agjencitë evropiane në luftën kundër korrupsionit dhe krimit të organizuar”, nënvizoi Lamallari.

Lamallari theksoi se “Shqipëria po harmonizon plotësisht kuadrin ligjor antikorrupsion përmes konsultimeve intensive me Komisionin Evropian mbi ligjet për konfliktin e interesit, sinjalizimin, lobimin dhe financimin e partive politike”.

“Të vendosur të vijojmë në rrugën e reformave dhe përmbushjes së objektivit tonë ambicioz për Shqipërinë 2030 në BE”, tha Lamallari.

Burimi ATSH