Këshilli i Bashkëpunimit Rajonal (RCC) mblodhi në Tiranë të rinj nga i gjithë Ballkani Perëndimor të cilët u informuan mbi përfitimet e Planit të ri të Rritjes.

“Të rinj të fuqizuar do të thotë më shumë krijimtari, më shumë sipërmarrje dhe një rajon që bashkëpunon më mirë e përballon sfidat më lehtë” – ishte motoja e këtij takimi.

Në takimin rajonal “Fireside Talk” në Tiranë të rinjtë diskutuan me përfaqësues të Bashkimit Europian dhe partnerë të tjerë mbi mënyrat se si Plani i Rritjes dhe Tregu i Përbashkët Rajonal mund të kthehen në vende konkrete pune, më shumë mundësi dhe arsye për të ndërtuar të ardhmen këtu.

Me mbështetjen e Bashkimit Evropian, këto biseda po shndërrohen në hapa praktikë: më shumë aftësi, më shumë lëvizshmëri dhe një treg pune ku zëri i të rinjve dëgjohet.

“Mbështetja e BE-së i vendos njerëzit në qendër, veçanërisht të rinjtë. Përmes Planit të Rritjes dhe nismave të tjera të BE-së si Garancia Rinore, ne hapim dyer për mundësi të reja. Forcojmë arsimin, ofrojmë aftësi që kërkohen sot në tregun e punës, krijojmë vende pune dhe u japim të rinjve një zë real”, tha Ritva Heikkinen, shefe e Bashkëpunimit në Delegacionin e Bashkimit Evropian në Shqipëri.

RCC fokusohet në promovimin dhe rritjen e bashkëpunimit rajonal në Evropën Juglindore (EJL), me qëllim integrimin evropian dhe euroatlantik të vendeve aspirante, si dhe ofron kapacitetet operacionale dhe punon nën drejtimin politik të SEECP.

Burimi ATSH