Ministria e Infrastrukturës dhe Energjisë ka finalizuar përgatitjet për mirëmbajtjen dimërore të akseve rrugore, me qëllim garantimin e qarkullimit normal dhe të sigurt gjatë muajve të ftohtë.

Zëvendëskryeministrja dhe njëkohësisht ministre e Infrastrukturës dhe Energjisë, Belinda Balluku, bëri të ditur sot nëpërmjet rrjeteve sociale se strukturat përgjegjëse janë në gatishmëri të plotë dhe se janë ndërmarrë të gjitha masat logjistike dhe teknike për menaxhimin e situatave të mundshme të motit të keq.

Sipas të dhënave të bëra publike janë 530 mjete të vendosura në dispozicion për ndërhyrjet në rrugë, 5050 tonë kripë janë siguruar për trajtimin e akullit dhe borës dhe 1200 punonjës janë angazhuar në operacionet e mirëmbajtjes dimërore.

Balluku nënvizoi se këto masa synojnë të garantojnë qarkullimin e pandërprerë dhe pa problematika në të gjitha akset rrugore të vendit, duke minimizuar rreziqet dhe vonesat për qytetarët dhe bizneset gjatë sezonit dimëror.

Strukturat e mirëmbajtjes do të jenë në shërbim 24 orë, ndërsa autoritetet u bëjnë thirrje drejtuesve të mjeteve të respektojnë udhëzimet dhe të udhëtojnë me mjete të përgatitura për kushtet e stinës.

Burimi ATSH