Investimet publike për vitin 2026 janë planifikuar në vlerën 179,6 miliardë lekë, ose sa 6,5% e Prodhimit të Brendshëm Bruto (PBB).

Sipas të dhënave nga projektbuxheti 2026, kjo shumë përfshin edhe fondin e rindërtimit në vlerën 5 miliardë lekë, si dhe 6,8 miliardë lekë financime të pritshme mbi bazë projektesh që do të mbështeten në kuadër të Planit të Rritjes me Bashkimin Evropian.

Në planifikimin e investimeve për vitin 2026 janë marrë në konsideratë të gjitha detyrimet kontraktuale për projektet me financim të huaj dhe të brendshëm, ndërsa prioritet do t’u jepet projekteve në vazhdim për të siguruar vijueshmërinë e tyre pa vonesa.

Në raport me buxhetin e rishikuar të vitit 2025, vëllimi i investimeve publike për vitin 2026 rezulton rreth 15,5 miliardë lekë më i lartë, duke reflektuar angazhimin e qeverisë për të ruajtur një nivel të lartë të shpenzimeve kapitale dhe për të mbështetur zhvillimin ekonomik afatgjatë të vendit.

Investimet do të përqendrohen në projekte me rëndësi strategjike kombëtare, në përputhje me prioritetet e Strategjisë Kombëtare për Zhvillim dhe Integrim 2021-2030, me fokus në infrastrukturë, digjitalizim, transport, bujqësi, arsim dhe shëndetësi.

Burimi ATSH