Komisioni për të Drejtat e Njeriut dhe Mjetet e Informimit Publik miratoi sot projektligjin “”Për regjistrimin e organizatave jofitimprurëse”, i cili garanton më shumë liri organizimi dhe siguri juridike për Organizatat jofitimprurëse.

Për prezantimin e këtij projektligji, i fituar ishte zëvendësministri i Drejtësisë, Tedi Dobi, ndërsa nisma ligjore u relatua nga deputetja Kiduina Zaka, e cila vlerësoi rëndësinë e projektligjit dhe ftoi kolegët ta miratojnë.

Pas pyetjeve dhe diskutimeve, komisioni miratoi në parim, nen për nen dhe në tërësi projektligjin në fjalë.

Pika e dytë e rendit të ditës ishte shqyrtimi i projektligjit “Për barazinë gjinore”. Për të prezantuar këtë projektligj ishte e ftuar zëvendësministrja e Shëndetësisë dhe Mirëqenies Sociale, Denada Seferi, e cila u shpreh se nisma ligjore ka për qëllim garantimin e të drejtave për gratë dhe burrat dhe mbrojtjen nga diskriminimi.

“Projektligji forcon më tej politikën për barazinë gjinore. Objektiv është përmirësimi i masave dhe mekanizmave për mbrojtjen, promovimin e barazisë gjinore mes grave dhe burrave. Qëllim kryesor është sigurimi i të drejtës së çdo individi dhe për mbrojtjen nga diskriminimi. Projektligji është rezultat i një pune të thelluar, janë bërë konsultime të gjëra me organizata të shoqërisë civile, etj. Kemi pasur ekspertizë të thelluar. Kemi harmonizuar projektligjin me direktivat e Bashkimit Evropian”, u shpreh Seferi.

Pas pyetjeve dhe diskutimeve, komisioni vendosi që projektligji në fjalë të votohet në mbledhjen e radhës.

Në punimet e këtij komisioni, deputeti i Partisë Socialiste, Arbjan Mazniku tha se në Komisionin Parlamentar për Të Drejtat e Njeriut dhe Mjetet e Informimit Publik, u prezantuan dy nisma të rëndësishme, si ndryshimet në ligjin “Për regjistrimin e organizatave jofitimprurëse”, edhe projektligji “Për barazinë gjinore”.

Sipas Maznikut, projektligji “Për regjistrimin e organizatave jofitimprurëse” garanton më shumë liri organizimi dhe siguri juridike për OJF-të, ndërsa projektligji i ri “Për barazinë gjinore”, përditëson kuadrin ligjor për të siguruar barazinë reale mes grave dhe burrave në çdo fushë të jetës, duke e bërë këtë parim një standard të matshëm dhe të zbatueshëm në praktikë.

Burimi ATSH