150 artistë nga vende të ndryshme të rajonit, do të mblidhen në qytetin e Korçës, për edicionin e parë të “Lulu Fest”.

“Lulu Fest” do të jetë një festival muzikor, gjatë të cilit do të zhvillohen seminare (masterclass) me instrumentistë e dirigjentë nga Shqipëria, Kosova, Italia e Kroacia.

Në një postim online, kryebashkiaku i Korçës, Sotiraq Filo shpjegoi se, festivali mban këtë emër në nder të Lulushit, artistit të madh korçar, një prej talenteve më të spikatura në artin frymor shqiptar, i cili ka tejkaluar kufijtë e qytetit e të vendit me artin dhe pasionin e tij.

Festivali frymëzohet gjithashtu nga banda historike “Vatra”, që ka qenë simbol i kulturës muzikore korçare mbi një shekull më pare dhe që Filo thotë se është një trashëgimi që duhet ringjallur te brezat e rinj.

Festivali do të zhvillohet këtë fundjavë, në 24, 25, 26 dhe do të ketë dhe performanca të shumta në rrugët e qytetit dhe në sheshin qëndror të Korçës.

“Ky është edicioni i parë i një festivali që e kemi konceptuar me dashuri dhe respekt të veçantë për traditën korçare, por edhe me një vizion të qartë për të ardhmen kulturore të qytetit”, tha Filo.

Momenti kulmor do të jetë koncerti i madh në fund të festivalit, kur të gjithë artistët, vendas e të huaj, do të interpretojnë së bashku veprën “Dua më shumë Shqipërinë”.

Burimi ATSH