Kryetari i grupit parlamentar të Partisë Socialiste, Taulant Balla, zhvilloi sot një takim në Senatin italian, ku u prit nga kryetarja e komisionit të Politikës së Jashtme dhe Mbrojtjes, Stefania Gabriella Anastasia Craxi.

Në këtë takim ku shoqërohej edhe nga deputeti socialist Skënder Pashaj dhe ai demokrat Saimir Korreshi, ambasadorja e Shqipërisë në vendin fqinj Anila Bitri Lani, Balla shprehu mirënjohjen për mbështetjen e vazhdueshme që Italia i ka dhënë Shqipërisë në procesin e integrimit europian, duke e cilësuar atë si një partner strategjik dhe mik të pandashëm.

“Vlerësojmë mbështetjen e pakursyer të Italisë në rrugëtimin e Shqipërisë në Bashkimin Europian”, deklaroi Balla, duke theksuar se të dyja palët ranë dakord për forcimin e bashkëpunimit dypalësh edhe në nivel parlamentar.

Në takim u diskutua dhe për marrëdhëniet e shkëlqyera mes Shqipërisë dhe Italisë, ku bashkëpunimi mes dy vendeve po rritet në fusha të ndryshme, nga ekonomia e siguria, deri në atë institucional dhe politik në kuadër të procesit të integrimit europian.

Burimi ATSH