Ministri i Mbrojtjes, Pirro Vengu zhvilloi sot një vizitë në repartin ushtarak të Bunavisë në Vlorë, ku përshëndeti 149 rekrutët e rinj dhe 76 kadetët e vitit të parë të Akademisë së Forcave të Armatosura.

““Bunavia” në Forcën e Armatosur gëzon një status të veçantë, të veshur në nder dhe respekt, një repart ku disiplina është e hekurt dhe ku vullneti për t’i shërbyer vendit kalitet çdo ditë.

“Sot pata kënaqësinë të përshëndes dhe uroj 149 rekrutët e rinj dhe 76 kadetët e vitit të parë të Akademisë së Forcave të Armatosura, që sapo kanë nisur rrugëtimin e tyre në uniformë, një etapë themelore në zinxhirin edukativ dhe stërvitor të Forcave të Armatosura të Shqipërisë”, theksoi Vengu.

Përmes një postimi në rrjetet sociale, Vengu nënvizoi më tej se vizitoi edhe “punimet e rehabilitimit të godinave, etapë e parë e modernizimit të kësaj baze strategjike”.

“Investimet në infrastrukturë do të pasohen nga investime në teknologji, mjete dhe sisteme, për t’iu përgjigjur nevojave të reja të formimit ushtarak”, shkruan Vengu.

Vengu bëri të ditur se në Bunavi ka nisur edhe dislokimi i një kompanie të sapokrijuar të Bazës Mbështetëse të Emergjencave Civile, që sipas ministrit “forcon ndjeshëm kapacitetet e mbrojtjes civile në jugperëndim të vendit”.

“Respekt dhe mirënjohje për të gjithë personelin akademik, instruktorët dhe ushtarët e Bunavisë, që mishërojnë përditë disiplinën, përkushtimin dhe nderin e uniformës”, shkruan Vengu.

Burimi ATSH