Në tremujorin e tretë të vitit 2025 bankat mbajtën të pandryshuar kushtet për kreditimin e biznesit, bën të ditur Vrojtimi mbi Kreditimin, i publikuar sot nga Banka e Shqipërisë.

Sipas vrojtimit, bankat mbetën të kujdesshme në vlerësimin e kredive me rrezik të lartë për bizneset. Megjithatë, ato kanë aprovuar një numër më të madh kredish, duke u bazuar në përmirësimin e situatës financiare të bizneseve, veçanërisht për ato të vogla dhe të mesme, si dhe për kreditë afatshkurtra për likuiditet.

Në të kundërt, qasja ndaj individëve ka qenë më konservatore. Gjatë këtij tremujori, bankat kanë shtrënguar ndjeshëm standardet dhe kushtet e kreditimit për individët, sidomos për kreditë për blerjen e banesave. Raporti tregon se është rritur ndjeshëm përqindja e refuzimeve të kredive për qytetarët.

Kufizimet e vendosura në korrik të këtij viti nga Banka e Shqipërisë mbi raportin e kredisë ndaj vlerës së disbursuar dhe mbi raportin e shërbimit të borxhit ndaj të ardhurave në kreditë e reja për pasuritë e paluajtshme, u raportuan po ashtu nga bankat si faktorë që vepruan në kahun shtrëngues të standardeve të kreditimit.

Për të blerë shtëpinë e parë, bankat tregtare nuk do të jepnin kredi më shumë se 85% të vlerës së banesës. Ndërkohë, për shtëpitë e dyta, bankat tregtare nuk do të jepnin kredi më shumë se 80% të çmimit të banesës. Kësti duhet të jetë 40% e të ardhurave të kredimarrësit për monedhën lekë dhe 35% për monedhën në valutë të huaj.

Sipas bankave, këto masa, së bashku me rrezikun e perceptuar për kolateralin dhe pasigurinë në tregun e banesave, kanë ndikuar në shtrëngimin e mëtejshëm të politikave për individët.

BSH parashikon se tremujorin e katërt: Për bizneset: Politikat e kreditimit pritet të mbeten të pandryshuara në përgjithësi, por bankat parashikojnë lehtësime të vogla për bizneset e vogla dhe të mesme. Për individët: Politikat pritet të vijojnë të shtrëngohen, sidomos në segmentin e kredive për blerjen e banesave.

Ndërkohë, kërkesa për kredi në tremujorin e tretë ka qenë e fragmentuar: Më e lartë nga bizneset e vogla dhe të mesme, më e ulët nga bizneset e mëdha dhe individët, sidomos për blerje banesash dhe kredi konsumatore.

Për tremujorin e katërt, pritet që kërkesa për kredi të mbetet e lartë nga bizneset, për të gjitha qëllimet, ndërsa nga individët pritet rënie për banesat dhe rritje e lehtë në kreditë konsumatore.

/Burimi ATSH