Ministri i Turizmit, Kulturës dhe Sportit, Blendi Gonxhja priti në takim, Juxhin Ramën i cili drejton Inter Club Albania, fan-klubin më të madh të F.C. Internazionale Milano jashtë Italisë.

Në qendër të takimit ishte konkretizimi i një akademie zyrtare të Interit në Shqipëri, për zhvillimin e talenteve të rinj, përfshirjen e komunitetit dhe ndërtimin e një terreni sportiv multifunksional të ri në Tiranë.

Gonxhja tha se “ky bashkëpunim synon të ndërthurë sportin, turizmin dhe zhvillimin komunitar, duke e vendosur Shqipërinë në qendër të vëmendjes ndërkombëtare përmes një marke sportive globale si Interi”.

Sipas tij, krijimi i Inter Academy Albania do të përfaqësonte një hap historik për futbollin shqiptar dhe për brezat e rinj në vend.

“Projekti nuk do të ishte vetëm një bashkëpunim sportiv, por dhe një nismë gjithëpërfshirëse sociale e edukative, që do të lidhte drejtpërdrejt klubin legjendar F.C. Internazionale Milano me sportdashësit vendas e rajonalë”, theksoi Gonxhja.

Ministri Gonxhja bëri të ditur se brenda nëntorit së bashku me Juxhin Ramën do të jenë në Milano për jetëzimin e këtij angazhimi dhe planin e punës.

Burimi ATSH