Presidentja e Komisionit Evropian, Ursula von der Leyen vlerësoi sot se “Shqipëria është në rrugën e duhur drejt Bashkimit Europian”.

Von der Leyen ndodhet në Tiranë në kuadër të Forumit të parë të Investimeve “Bashkimi Europian-Ballkani Perëndimor” që do të zhvillojë punimet në datat 13-14 tetor.

Presidentja e KE-së vlerësoi ritmin rekord të negociatave të Shqipërisë drejt anëtarësimit në BE në tre vitet e fundit.

“E nis me kënaqësi në Tiranë turin tim vjetor të Ballkanit Perëndimor. Shqipëria është në rrugën e duhur drejt BE-së, me ritme rekord gjatë tre viteve të fundit”, u shpreh ajo.

Von der Leyen shprehu gatishmërinë për të mbështetur Shqipërinë në çdo hap të rrugës.

Presidentja e KE-së, Von der Leyen u prit sot në takime të veçanta nga presidenti Bajram Begaj dhe kryeministri Edi Rama.

Ajo do t’i drejtohet me një fjalë Forumit të parë të Investimeve Bashkimi Europian-Ballkani Perëndimor, i cili mbledh në Tiranë përfaqësues të lartë qeveritarë nga Bosnja dhe Hercegovina, Kosova, Mali i Zi, Maqedonia e Veriut dhe Serbia, si dhe vendimmarrës, institucione financiare ndërkombëtare, investitorë strategjikë dhe kompani lidere nga BE-ja dhe më gjerë.

Forumi i Investimeve “Bashkimi Europian-Ballkani Perëndimor”, një iniciativë e mbështetur nga Komisioni Europian, ka për qëllim të forcojë bashkëpunimin ekonomik dhe të nxisë mundësi të reja investimi midis vendeve të Ballkanit Perëndimor dhe Bashkimit Europian.

Burimi ATSH