Qeveria ka ndryshuar vendimin ekzistues që përcakton mbrojtjen personale për kryetarët e gjykatave kundër korrupsionit dhe krimit të organizuar, drejtuesin e Prokurorisë së Posaçme dhe drejtorin e Byrosë Kombëtare të Hetimit.

Sipas vendimit të ri, këta zyrtarë do të shoqërohen me truproje të nivelit bazë dhe të mesëm gjatë gjithë kohës së mandatit dhe për një periudhë shtesë 2 vjet pas përfundimit të mandatit për kryetarët e gjykatave kundër korrupsionit dhe krimit të organizuar dhe drejtorin e BKH dhe 3 vjet për drejtuesin e SPAK.

Këshilli i Ministrave miratoi në mbledhjen e sotme ndryshim në vendimin nr. 478, datë 10.7.2019, të Këshillit të Ministrave, “Për procedurën e sigurisë së gjyqtarëve të gjykatave kundër korrupsionit dhe krimit të organizuar, të prokurorëve të Prokurorisë së Posaçme dhe drejtorit të Byrosë Kombëtare të Hetimit”.

“Në Pikën 3 të vendimit “Për procedurën e sigurisë së gjyqtarëve të gjykatave kundër korrupsionit dhe krimit të organizuar, të prokurorëve të Prokurorisë së Posaçme dhe drejtorit të Byrosë Kombëtare të Hetimit”, ndryshohet, si më poshtë vijon:

Garantimi i mbrojtjes personale të kryetarëve të gjykatave kundër korrupsionit dhe krimit të organizuar dhe drejtorit të Byrosë Kombëtare të Hetimit bëhet nëpërmjet shoqërimit me truprojë të nivelit bazë dhe truprojë të nivelit të mesëm gjatë kohëzgjatjes së mandatit dhe për një afat jo më shumë se 2 (dy) vjet pas përfundimit të tij.

Garantimi i mbrojtjes personale të drejtuesit të Prokurorisë së Posaçme bëhet nëpërmjet shoqërimit me truprojë të nivelit bazë dhe truprojë të nivelit të mesëm gjatë kohëzgjatjes së mandatit dhe për një afat jo më shumë se 3 (tre) vjet pas përfundimit të tij”, thuhet në vendim.

Burimi ATSH