Këshilli i Ministrave miratoi sot emërimin në detyrë të tri zëvendësministreve, si dhe largimin nga detyra të dy zëvendësministrave të tjerë.

Në mbledhjen e sotme të qeverisë të drejtuar nga kryeministri Edi Rama u miratua emërimi i Edona Bilalit, zëvendësministre e Infrastrukturës dhe Energjisë.

Edona Bilali ka qenë deputete e PS-së gjatë mandatit të tretë qeverisës, ndërsa ka mbajtur edhe postin e ministres së Shtetit për Mbrojtjen e Sipërmarrjes.

Po ashtu, Këshilli i Ministrave miratoi me vendime të veçanta edhe emërimin e Eugena Tominit zëvendësministre të Shëndetësisë dhe Mirëqenies Sociale dhe Silva Cakës, zëvendësministre e Punëve të Brendshme.

Eugena Tomini ka mbajtur edhe më parë postin e zv.ministres së Shëndetësisë dhe Mbrojtjes Sociale, ndërsa ka drejtuar edhe Institutin e Shëndetit Publik.

Ndërsa Silva Caka ka qenë deputete e Kuvendit nga radhët e Lëvizjes Socialiste për Integrim, sot Partia e Lirisë. Ajo është po ashtu anëtare e këshillit bashkiak të Tiranës.

Në mbledhjen e sotme u liruan po ashtu nga detyra dy zëvendësministra.

Konkretisht Mira Kapisyzi u lirua nga detyra e zëvendësministres së Shëndetësisë dhe Mbrojtjes Sociale, si dhe Andi Mahila u lirua nga detyra e zëvendësministrit të Brendshëm.

Largimi nga detyra i Andi Mahilës u komunikua disa ditë më parë nga ministrja e Punëve të Brendshme, Albana Koçiu. Shkak për këtë vendim është shkelja e ligjit antiduhan nga ana e Mahilajt, i cili u raportua nga një qytetar për konsumimin e duhanit në ambientet e një restoranti.

Burimi ATSH