Nga Petrit Malaj
Ambasadori i Shqipërisë në Kosovë

Mbrëmë pata nderin dhe kënaqësinë të hap zyrtarisht ciklin kulturor “Netët e Filmit Shqiptar”, në ambientet mikpritëse të Kino Armata në Prishtinë – një nismë që përmes artit dhe kujtesës së përbashkët sjell më afër publikut në Kosovë trashëgiminë e pasur të kinematografisë sonë kombëtare.

Në një atmosferë të ngrohtë dhe me pjesëmarrje mbresëlënëse nga përfaqësues të institucioneve të Kosovës, ambasadorë, anëtarë të trupit diplomatik dhe dashamirës të filmit shqiptar, kjo mbrëmje dëshmoi edhe një herë lidhjen e thellë të publikut kosovar me historinë, emocionin dhe identitetin e kinemasë sonë.

Ceremonia e hapjes u shënua nga shfaqja e filmit klasik “Përrallë nga e Kaluara”, si një homazh i denjë për mjeshtrin Dhimitër Anagnosti, i cili u nda nga jeta pak kohë parë, por vazhdon të jetojë përmes veprave të tij që i përkasin fondit të artë të kulturës shqiptare.

Ky projekt është rezultat i një bashkëpunimi të ngushtë mes Ambasadës së Republikës së Shqipërisë në Kosovë, Arkivit Qendror Shtetëror të Filmit në Tiranë dhe Kino Armata në Prishtinë, dhe ka si qëllim të promovojë vlerat tona të përbashkëta kulturore e historike përmes gjuhës universale të artit.

Në javët në vijim, publiku do të ketë mundësinë të ndjekë disa prej filmave më përfaqësues të kinematografisë shqiptare:
• Koncert në vitin 1936 – Saimir Kumbaro (8–9 tetor 2025)
• Vdekja e Kalit – Saimir Kumbaro (29–30 tetor 2025)
• Kur xhirohej një film – Fehmi Hoshafi (3–4 nëntor 2025)
• Kapedani – Fehmi Hoshafi & Muharrem Fejzo (12–13 nëntor 2025)

Të gjitha shfaqjet janë të hapura për publikun dhe me hyrje falas. Një vëmendje e veçantë i është kushtuar të rinjve dhe nxënësve të shkollave, të cilët do të kenë mundësinë të ndjekin projeksione të dedikuara posaçërisht për ta – duke u njohur me historinë e kinematografisë sonë në gjuhën tonë të ëmbël shqipe.

“Netët e Filmit Shqiptar” përfaqësojnë një formë të gjallë të diplomacisë kulturore në veprim – një diplomaci që ndërton ura përmes kujtesës, krijimtarisë dhe vlerave të përbashkëta që na bashkojnë si shqiptarë.

(Marrë nga faqja e tij në Facebook)