Asambleja e Partisë Socialiste nisi sot punimet në Pallatin e Kongreseve në Tiranë.

Kryeministri e njëherësh kryetari i PS, Edi Rama u shpreh gjatë fjalimit të tij para Asamblesë Kombëtare se Partia Socialiste nuk ka hyrë asnjëherë në çështjet e drejtësisë.

“Ama duhet thënë që në fillim sa më qartë atë që besoj seduhet të ndajmë të gjithë së bashku mbi çështjen e drejtësisë dhe raportin tonë me të. Ne, PS, nuk kemi hyrë në asnjë rast dhe për asnjë rast në meritën e një çështjeje të drejtësisë, aq më tepër kur drejtësia nuk e ka thënë deri në fund fjalën e saj. Nuk e kemi bërë këtë dhe nuk do ta bëjmë asnjëherë, duke bërë avokatin e kujtdo ndër njerëzit e kësaj familjeje të madhe politike që hetohet apo ndalohet nga policia, edhe kur mund të mos na duket e drejtë”, u shpreh Rama.

“Nuk kemi pasur dhe nuk do të kemi, për sa kohë unë do jem në krye, asnjë pendesë për lirinë dhe për pavarësinë që i kemi dhënë drejtësisë me Reformën në Drejtësi dhe mbi të gjitha me tërheqjen historike të pushtetit të shumicës, nga fusha e pushtetit gjyqësor. Përmes reformës i kemi larguar me vetëdije të plotë duart e ekzekutivit nga çdo proces seleksionimi, zgjedhjeje, promovimi, apo shkarkimi i prokurorëve dhe i gjykatësve, dhe po ashtu nga çdo lloj forme kontrolli mbi aktivitetin e tyre”, tha Rama.

Kryeministri Edi Rama do të paraqesë edhe kabinetin e ri qeveritar pas fitores në zgjedhjet parlamentare të 11 majit.

Në mbledhjen e Asamblesë të PS-së pritet që kryeministri Rama të shpalosë edhe piketat e programit qeverisës për 4 vitet e ardhshme, ku prioritet mbeten reformat e nevojshme për integrimin evropian, nën sloganin “Shqipëria 2030 në BE”.

Sipas rendit të ditës, pas fjalës së kryeministrit Rama, do të ketë një hapësirë për diskutime.

Burimi ATSH