Kryeministri Edi Rama paralajmëroi sot se në paketën e re për hapësirën publike do të parashikohet përgjegjësi ligjore për inspektorët në terren që “mbyllin sytë” ndaj ndërtimeve pa leje.

I pyetur në një intervistë televizive për prishjen e ndërtimeve pa leje, Rama u shpreh se, “në paketën e re që do të prezantojmë në javën e ardhshme ne do fusim në ligj dhe përgjegjësinë drejtpërdrejt të symbylljes”.

“Nuk mund të thuash që isha inspektor dhe nuk e pashë. Do duhet të mbash përgjegjësi edhe ti, ligjore, që nuk e kemi sot. Këto janë sfida të cilat i kanë kaluar dhe jetojnë edhe sot edhe vende shumë të mëdha”, tha Rama.

Sa i përket ndërtimeve pa leje në Theth, kryeministri tha se kur u njohën me situatën, “gjërat ishin bërë fakt”.

“Ne nuk kemi pasur dijeni për këtë. Ata që duhet të bënin këtë gjë janë shkarkuar nga puna dhe janë larguar që të gjithë, që nga drejtori i madh i Shkodrës”, u shpreh ai.

Rama tha se prishjet e godinave me qëllim fitimi do të vazhdojnë kudo.

“Shtëpia është tjetër gjë, jo se duhet ndërtuar pa leje, dhe godinat për qëllim fitimi është tjetër gjë. Ndërtimi i një shtese në shtëpi, në një truall tëndin në fshat është komplet tjetër gjë dhe marrja e trotuarit në mes të Tiranës, ose marrja e këtij oborri brenda lagjes për të bërë çfarë të duash ti, janë hequr”, tha ai.

Kryeministri Rama u shpreh se do të përdoret teknologjia dhe nga ana tjetër do të rishikohet skema e policive bashkiake dhe e inspektorateve.

“Me masën e re ligjore do duhet të përgjigjen para ligjit”, tha ai.

“Kjo është historia ime edhe pak personale. Ti e di shumë mirë, që fillimi i prishjeve ka qenë kur hyra në Bashkinë e Tiranës. E di që kjo është histori e gjatë, por unë nuk e lë këtë histori pa e mbyllur”, shtoi më tej kryeministri.

Ai preku edhe Fondin e Gjelbër që pritet të krijohet nga qeveria. Me rregulloren e re, paralajmëroi Rama, për çdo karrige që do të vendoset jashtë nga bizneset do të kontribuohet me një pemë.

“Do mbjellim shumë në Shqipëri në këtë pesëvjeçar, do krijojmë korridore në anë të autostradave dhe aty do të detyrojmë mbjellje”, u shpreh kryeministri Rama.

/Burimi ATSH