Kryeministri Edi Rama deklaroi sot se, Samiti i NATO-s në Tiranë do të mbrohet me dronë “Made in Albania”.

Në një intervistë televizive sot, Rama u shpreh se, Shqipëria ka hyrë në një fazë tjetër, duke përmendur se në Tiranë do të mbahet samiti i NATO-s në vitin 2027.

Rama u shpreh se gjatë samitit të NATO-s në Tiranë hapësira ajrore do të mbrohet me dronë të prodhuar në Shqipëri.

“Ne kemi hyrë në një fazë tjetër. Na doli përpara pandemia dhe tërmeti që na bënë një frenim që nuk kishim çfarë i bënim. Ne, për shembull, në samitin e NATO-s, që është niveli më i lartë i sigurisë në botë, do ta mbrojmë territorin e Tiranës me dronët e prodhimit shqiptar”, tha Rama.

Rama theksoi se, e gjithë kjo është faza e rilindjes së industrisë sonë ushtarake.

“Ne do të prodhojmë dronët që do të mbrojnë hapësirën, këtu do të jemi, në 2027-ën. Në Shqipëri. Do t’i prodhojmë këtu. Ne do të eksportojmë dronë “made in Albania””, u shpreh Rama.

“Natyrisht, që ne do t’i bëjmë këto me partnerë nuk diskutohet. Por ama në pranverën e 2027-ës do të mbrojmë qiellin e Tiranës me dronët me shqiponjën dhe me flamur të kuq”, theksoi kryeministri.

Rama shtoi se, vendi ynë do të prodhojë dhe autobusët e shkollave.

“Ne do të prodhojmë autobusët e shkollave. Ne kemi sot që flasim çerek milion fëmijë dhe nxënës. Si t’i bëjmë, t’i lëmë pa shkollë këta?! Mos të bëjmë shkolla më të bukur?! Do t’i prodhojmë këtu në Shqipëri autobusët e shkollave, që do çojnë fëmijët në shkolla, hap pas hapi, kuptohet, gjatë këtij mandati që nis, këtyre 4 vjetëve. Ne do të prodhojmë makinat tona ushtarake dhe do t’i shesim botës makina ushtarake”, theksoi Rama.

“Shtetit shqiptar, qeveria, Ministria e Mbrojtjes që dikur hidhte në erë njerëz sepse demontonte municione me fëmijë skllevër në një fabrikë vdekje dhe lejonte trafiqe, Ministria e Mbrojtjes do të jetë bashkëpronare e gjithë kësaj industrie dhe shteti shqiptar do të fitojë para nga kjo industri”, tha Rama.

“Ne do të prodhojmë në fund të gjitha llojet e uniformave për të gjitha llojet e trupave. Më në fund do t’i prodhojmë pa tendera”, tha Rama.

Burimi ATSH