Kryeministri Edi Rama deklaroi sot se problemi i pastërtisë së territorit ka shënuar përmirësim, megjithatë niveli aktual nuk është ende i kënaqshëm.

Gjatë një interviste në media, Rama theksoi se prej tre vitesh, gjatë sezonit veror, bashkitë nuk kryejnë më pastrimin vetëm me forcat e tyre, por mbështeten nga qeveria, e cila shpërndan kompani shtesë për pastrimin. Kjo, sipas tij, ka ndikuar pozitivisht në përmirësimin e pastërtisë në plazhe dhe rrugë.

“Diçka që nuk mund ta bëjë dot qeveria është t’u mbajë dorën qytetarëve që të mos hedhin plehrat në rrugë”, tha Kryeministri.

Ai informoi gjithashtu se në mandatin e katërt qeverisës do të nisë zbatimi i projektit për qytete inteligjente, që përfshin monitorimin digjital të territorit dhe shërbimeve publike.

“Së shpejti do të kemi kamera inteligjente nëpër qytete që do të monitorojnë çdo gjë, që nga ndjekja e pjesëmarrjes së nxënësve në shkolla, tek administrimi i institucioneve arsimore dhe garantimi i sigurisë në ambientet shkollore”, u shpreh ai.

Rama shtoi se do të instalohet një sistem i avancuar kamerash që do të lejojë monitorimin në kohë reale të çdo ndërtimi pa leje, si dhe të problematikave të tjera në hapësirat urbane.

Burimi ATSH