Kryeministri Edi Rama u shpreh se nuk ka shkarkuar asnjë drejtor në pushtetin lokal, por u ka kërkuar dorëheqjen që më pas të hapej gara.

I pyetur në një intervistë televizive nëse po merr edhe kontrollin e pushtetit lokal, Rama tha se kryetarët e bashkive janë të PS dhe se ishte detyrë e tij për t’u treguar se nuk po bëjnë punën që janë votuar nga qytetarët.

“Kur kryetari i bashkisë nuk e sheh apo nuk e zgjidh atëherë ne, PS, që i kemi dhënë atij kryetari besimin dhe që i dëgjojmë qytetarët se çfarë thonë. Unë patjetër si një njeri që i kam borxh Vlorës, sepse më ka votuar masivisht dhe Durrësit që më ka votuar masivisht dhe sa të jem në politik do të jem edhe deputeti i Vlorës, edhe i Durrësit”, tha Rama.

“Unë nuk shkarkoj, shkarkimet i bëjnë ata, por unë kam detyrimin që të shkoj dhe t’u them, e dëgjoni çfarë thotë populli. I shikoni ju rezultatet. Unë u them që këta njerëz duhet të largohen dhe duhet t’u kërkohet dorëheqja. Duhet ta kuptojnë që boll është boll. Dhe duhet të hapet gara, siç ndodhi në Vlorë, që të gjithë ata që duhet të kontribuojnë të bëjnë përpjekjen e tyre”, u shpreh Rama.

/Burimi ATSH