Kryeministri Edi Rama u shpreh sot se një nga problemet themelore të furnizimit me ujë është niveli i ulët i burimeve njerëzore të ndërmarrjeve të ujësjellës kanalizimeve.

“Jam i bindur se drejtorët e shoqërive këtu e kanë parë me sytë e tyre se me sa pak forca realisht të përgatitura teknikisht bëjnë punën dhe sa forca parazite janë në ndërmarrje që janë aty si rezultat i krushqisë, politikës, tarafit, fqinjësisë së mirë në rrugën e fshatit”, tha Rama.

Kryeministri siguroi se Operatori Kombëtar i Ujit do të ketë kapacitetin që të jetë i distancuar nga kjo, siç u distancua totalisht nga politika OSHEE.

“Nuk bën vaki që drejtuesit e OSHEE-së t’i vendosë partia, apo të lëvizin lart e poshtë se do partia, është epokë e mbyllur. OSHEE është një ndërmarrje që funksionon tanimë me rregullat e një korporate që ka rezultate dhe energjia nuk është një mall që dikujt ia shet, dikujt ia fal, dikujt ia jep për bamirësi”, shtoi Rama.

Kryeministri siguroi se e njëjta gjë do të bëhet edhe me ujin.

“Siç kanë përfituar shumica dërrmuese e qytetarëve nga transformimi i OSHEE-së nga një ‘bandë’, në një korporatë, do të fitojnë shumica e qytetarëve dhe popullsisë nga transformimi i këtyre shoqërive në një korporatë shtetërore publike të ujit”, shtoi Rama.

Edhe në këtë sektor, Rama theksoi se “do të përpiqemi të krijojmë partneritete që do të na ndihmojmë të rrisin më tej cilësinë e punës”.

“Por, më e rëndësishmja, siç kemi sot në OSHEE kapacitete teknike dhe në nivelin e parë të specialistëve kemi trajnime dhe punë të vazhdueshme që po krijon hap pas hapi kompaktësi dhe vlerë të kapitalit njerëzor, kështu do të bëjmë dhe me ujin, siç u kemi dhënë mundësi teknikëve dhe inxhinierëve të rinj të vijnë të konkurrojnë, të hyjnë në punë pavarësisht se janë nga familje të majta, të djathta apo janë pa bindje politike. Politika jonë është të bëjmë shërbime më të mira për njerëzit dhe jo të përdorim pushtetin për të kthyer kompanitë qendrore në vende qokash. Do të bëjmë të njëjtën gjë me Operatorin e Ujit”, shtoi Rama.

/Burimi ATSH