Gjatë pasdites së sotme në territorin e Bashkisë Pogradec u shënua një situatë e pazakontë për shkak të stuhisë me erë të fortë dhe reshje shiu, e cila shkaktoi probleme në disa zona.

Në një njoftim, bashkia Pogradec bën me dije se falë reagimit në kohë të strukturave tona, në bashkëpunim me MZSH, Shërbimin Pyjor, NPR, NMIPP dhe Policinë Bashkiake, u arrit që situatat e krijuara të menaxhohen dhe të minimizohen dëmet.

Sipas bashkisë Pogradec, situata ishte më e ndërlikuar në fshatin Pojskë, ku një zjarr i përhapur me shpejtësi për shkak të erës së fortë, u izolua dhe u vu nën kontroll falë ndërhyrjes së menjëhershme të MZSH-së dhe mbështetjes së punonjësve të shërbimeve dhe Shërbimit Pyjor.

Pavarësisht dëmeve të pjesshme në një njësi shërbimi, u arrit të shpëtohet pjesa më e madhe e godinës dhe godinave të tjera në zonë.

Bashkia e Pogradecit cilëson se era e fortë shkaktoi gjithashtu thyerje pemësh dhe degësh, të cilat po pastrohen aktualisht nga Ndërmarrja e Gjelbërimit.

Sipas parashikimeve, moti i keq pritet të vijojë. Bashkia apelon që qytetarët të shmangin lëvizjet e panevojshme dhe të tregojnë kujdes të shtuar.

Për çdo rast emergjence, kontaktoni numrat 127, 128 dhe 129.

Gjithashtu, ju lutemi të njoftoni kryetarët e fshatrave dhe njësive administrative për çdo problematikë të evidentuar.

Bashkia Pogradec mbetet e angazhuar maksimalisht për mbrojtjen e banorëve dhe menaxhimin e situatave emergjente.

Burimi ATSH