Drejtoresha Ekzekutive e Agjencisë për Zhvillimin e Investimeve në Shqipëri (AIDA), Laura Saro, zhvilloi sesion pune online me përfaqësues të Agjencisë Algjeriane për Promovimin e Investimeve (The Algerian Agency for Investment Promotion), institucion homolog i AIDA-s në Algjeri.

Takimi u zhvillua në prani të Ambasadores së Algjerisë në Republikën e Greqisë, njëkohësisht e akredituar edhe për Shqipërinë, Zaina Benhabouche, e cila shprehu mbështetjen e saj për thellimin e bashkëpunimit ekonomik ndërmjet dy vendeve.

Gjatë takimit u diskutuan mundësitë për shkëmbim përvojash, ndarjen e praktikave më të mira institucionale, si dhe nxitjen e investimeve dypalëshe në sektorë me potencial të lartë zhvillimi. Palët shprehën angazhimin për të ndërtuar ura konkrete bashkëpunimi, në funksion të krijimit të një klime sa më të favorshme për investitorët.

“Ky zhvillim shënon një hap të rëndësishëm drejt forcimit të marrëdhënieve ekonomike ndërmjet Shqipërisë dhe Algjerisë, duke hapur rrugën për nisma të përbashkëta në fushën e promovimit të investimeve dhe bashkëpunimit ndërinstitucional”, u shpreh Saro.

Burimi ATSH