Ministria e Ekonomisë ka hartuar një projektligj të posaçëm për rregullimin e tregut të produkteve që shiten online, izolimin e reklamimit të mallrave të pasigurta si dhe eliminimin e konkurrencës së pandershme.

Për tregtimin dhe mbikëqyrjen e tregut të produkteve joushqimore, projektligji synon të forcojë kontrollet me qëllim përafrimin e legjislacionit me BE.

Në një intervistë televizive, zëvendësministri i Ekonomisë, Enkelejd Musabelliu, tregon se si do të funksionojë nëse ky projektligj merr dritën jeshile në komisionet parlamentare.

“Shumë produkte të shitura online që vijnë nga jashtë territorit shqiptar nuk kanë një subjekt të identifikueshëm në Shqipëri, duke kufizuar ndjeshëm ndërhyrjen e strukturave përgjegjëse në rastet kur produktet paraqesin rrezik për shëndetin e përdoruesve. Ndërsa masa do të merren duke filluar që nga gjurmueshmëria e produktit”, thotë ai.

Përmes këtij projektligji, synohet të forcohet mbikëqyrja e produkteve të shitura në largësi, duke krijuar mekanizma ligjorë të qartë për identifikimin e përgjegjësisë, ndërhyrjen efektive dhe promovimin e një mjedisi të drejtë dhe të sigurt tregtar, në përputhje me standardet evropiane.

Burimi ATSH