Shqipëria ka përmbyllur me sukses ciklin e raportimeve me Komisionin Evropian për kapitujt 23 dhe 24.

Kështu bëri me dije sot ministri i Drejtësisë Ulsi Manja, i cili nëpërmjet një postimi në rrjetet sociale nënvizoi se Shqipëria “dëshmoi se shteti i së drejtës ndërtohet me punë të përditshme, bashkëpunim institucional dhe rezultate të prekshme”.

Manja theksoi se në këtë proces, Ministria e Drejtësisë ka udhëhequr 21 takime raportuese, mbi 85 orë diskutime e negociata dhe mbi 3500 faqe dokumentacion teknik.

“Tabelat e përputhshmërisë, draftligjet, relacione shpjeguese dhe analizat cilësore tregojnë qartë për një proces që ecën me standardet më të larta evropiane”, theksoi Manja.

Nën drejtimin e Ministrisë së Drejtësisë, sipas ministrit, “55 institucione dhe afro 200 profesionistë kanë punuar ngushtësisht për këtë proces, duke garantuar një raportim të besueshëm dhe të plotë”.

“Një hap tjetër drejt Shqipëria2030 dhe familjes evropiane”, shkruan Manja.

Burimi ATSH