Në Ditën Ndërkombëtare të Diversitetit Kulturor për Dialog dhe Zhvillim, ministri i Ekonomisë, Kulturës dhe Inovacionit, Blendi Gonxhja, vuri theksin te promovimi i mozaikut tonë të pasur kulturor, një pasuri që na përfaqëson jo vetëm në Shqipëri, por është edhe ambasadori ynë më i mirë në botë.

“Çdo gjuhë, rit, këngë, traditë apo veshje popullore nuk është thjesht trashëgimi dhe kulturë, është pjesë e identitetit tonë të përbashkët dhe dëshmi e historisë që na bashkon”, shkroi ministri Gonxhja në rrjetet sociale.

Ndërkohë ministri njoftoi se, sot hyrja në të gjitha sitet tona kulturore është falas për çdo vizitor. Kjo është një ftesë për të gjithë që të ecim mes historisë, të mësojmë nga e shkuara dhe të vlerësojmë shumëllojshmërinë që e bën kulturën tonë kaq të pasur.

Kreu i MEKI-t ftoi të jemi më kuriozë, më të hapur, më respektues ndaj kulturës së tjetrit, sepse kultura është dialog dhe zhvillim.

Burimi ATSH