Prej 5 muajsh, në shkollën “Dhaskal Todri” në Elbasan po pilotohet aplikacioni “Fib Sat”, një mënyrë inovative për t’u mësuar të rinjve si të menaxhojnë financat personale, në përputhje me kurrikulën e ekonomisë.

Ministrja e Shtetit për të Rinjtë dhe Fëmijët, Bora Muzhaqi ishte sot në ambientet e kësaj shkolle, ku bisedoi me nxënësit mbi përfitimet e këtij aplikacioni.

“Përmes këtij aplikacioni, të rinjtë kanë kursyer, investuar, mësuar nga video dhe pyetësorë interaktivë, si dhe janë shpërblyer për notat e mira. Në gjysmën e rrugëtimit patën mundësinë të tërhiqnin fitimet, por të gjithë zgjodhën të vazhdojnë, duke treguar se kjo lojë ka ndihmuar në zhvillimin e mëtejshëm të aftësive të tyre”, u shpreh Muzhaqi.

Ministrja theksoi se “ky pilotim tregoi se ky aplikacion nuk ishte thjesht një lojë, por një mjet edukues që i ndihmoi të rinjtë të mësojnë durimin, planifikimin dhe menaxhimin financiar në mënyrë të prekshme dhe reale”.

“Tani që po i afrohemi fundit të fazës së pilotimit, jemi më të bindur se kurrë: edukimi financiar funksionon më mirë kur lidhet me përvojën, vendimmarrjen dhe shpërblimin real!

Një falënderim të veçantë për ekipin e ‘Fi Bank’, mësuesit dhe drejtuesit e shkollave për mbështetjen e pakursyer për realizimin me sukses të këtij programi” shtoi ajo.

Burimi ATSH