Kryeministri Edi Rama përgëzoi sot peshëngritësen shqiptare Enkileda Carja, e cila u shpall kampione bote në Botërorin e Peshëngritjes për moshat deri 17 vjeç që po mbahet në kryeqytetin e Perusë, Lima.

Në një postim në rrjetet sociale Rama ndau momente nga gara e peshëngritëses Carja, në Kampionatin Botëror të Peshëngritjes.

“Talenti i madh i peshëngritjes shqiptare, Enkileda Carja, shpallet Kampione Bote e 3-fishtë dhe thyen 3 rekorde europiane për teë reja. Në Kampionatin Botëror, që po zhvillohet në Lima të Perusë, Enkileda merr edhe një medalje bronxi për moshat U-20. Mirënjohje, respekt, ovacione, krenar për Shqipërinë”, shkruan Rama.

Kjo është hera e parë që Shqipëria fiton medalje ari për të rinjtë në një kompeticion të tillë, ndërsa sportistja ka dominuar në pedanë dhe veç titullit kampione bote në shkëputje, shtytje dhe dygarësh, ka thyer edhe tre rekorde evropiane duke përmirësuar peshat e ngritura.

Peshëngritësja Carja ngriti me radhë 94, 97 dhe 98 kilogramë në shkëputje, për të merituar medaljen e parë të artë. Më pas triumfoi edhe në shtytje, teksa finalizoi me sukses provat me 110, 113 dhe 115 kilogramë. Me 213 kilogramë në total, sportistja kuqezi koleksionoi gjithashtu edhe medalje ari në dygarësh, duke e mbyllur si kampione e trefishtë e botës për U-17.