Ministrja e Arsimit dhe Sportit, Ogerta Manastirliu tha se, “marrëveshja ndërmjet QSUT dhe Universitetit të Mjekësisë, me qendrën spitalore universitare të ekselencës europiane “San Raffaele” dhe universitetin përkatës “Vita – Salute San Raffaele”, shënon një gur themeli në ofrimin e shërbimit shëndetësor shqiptar cilësor, bazuar në kërkimin shkencor”.

E pranishme në takimin që u zhvillua sot, në Qendrën Spitalore Universitare “Nënë Tereza”, në Tiranë, me rastin e nënshkrimit të kësaj marrëveshje, me pjesëmarrjen e kryeministrit Edi Rama, ministrja Manastirliu tha se, “sot procesi i ndërkombëtarizimit të universiteteve tona me universitetet më të mira europiane dhe më gjerë, shënon një gur kilometrik në të gjithë reformën e Arsimit të Lartë”.

Sipas saj, në këto vite Universiteti i Mjekësisë i Tiranës ka përfituar rreth 30 projekte të kërkimit shkencor, me synimin për rritjen e shërbimit shëndetësor sipas standardeve më të mira.

“Përmes këtij partneriteti të ri, ne do të kemi ekselencë në programet akademike, kërkimin shkencor dhe mbi të gjitha në shërbimet klinike ndaj qytetarëve”.

Manastirliu u ndal në hapat që janë hedhur sa i takon ndërkombëtarizimit të universiteteve.

“Jo vetëm falë marrëveshjeve mes universiteteve tona dhe atyre të huaja, por edhe ngritjen e kampuseve të universiteteve europiane në Shqipëri, po vijojmë të zgjerojmë bazën e Arsimit të Lartë, duke rritur interesin jo vetëm të studentëve tanë, por edhe të studentëve të huaj për të studiuar në Shqipëri, në universitete që kanë partneritete, ofrojnë programe të përbashkëta studimi dhe diploma dyfishe dhe tashmë edhe me kampuse të universiteteve europiane, siç është ai i Kolegjit të Europës në Tiranë, kampusi i Universitetit të Studimeve në Distancë të Spanjës dhe po punojmë të hapim kampusin e tretë të Universitetit Teknologjik të Compiègne-it në Universitetin Politeknik të Tiranës”, deklaroi Manastirliu.