Prej vitit 2020, janë dhënë 49 milionë shërbime online përmes platformës e-Albania.

Kështu deklaroi sot kryeministri Edi Rama në aktivitetin “Fuqizimi i AI në Shërbimet Publike Digjitale në Shqipëri” për modernizimin e administratës publike.

Rama tha se, “janë 3.3 milionë përdorues, pra të gjithë shqiptarët që janë aktivë brenda apo jashtë vendit përdorin platformën dhe bizneset, të gjithë e përdorin platformën. Prej vitit 2020, janë dhënë 49 milionë shërbime”.

“Parafytyroni 49 milionë qëndrime në radhë, 49 milionë kontakte sy më sy e vesh më vesh, frymë me frymë me shtetin nëpër sportele. 49 milionë raste ku mundësia për të dalë të stresuar nga kontakti apo për të pasur ndjesinë e një dore që të futet në pantallona për të kërkuar lekë është mundësi reale. Të gjitha këto të eliminuara bashkë me mortjen e korrupsionit endemik, që ishte mortje që e persekutonte Shqipërinë në çdo sportel dhe hap”, nënvizoi Rama duke shtuar se kjo nuk ekziston më.

Kreu i qeverisë bëri të ditur se “ne kemi bërë një audit ndërkombëtar të platformës për të kuptuar se çfarë ka prodhuar ky transformim. 620 milionë euro të kursyera për qytetarët dhe bizneset vetëm nga ky transformim dhe nga asgjësimi i radhëve dhe kursimi i kohës. 1 miliardë km rrugëtim, vajtje ardhje njerëzish për të marrë dokumentet, ose 25 mijë xhiro rreth tokës. Ata që jetojnë jashtë kanë kursyer 57 milionë euro nga fakti që mund t’i marrin shërbimet nëpërmjet platformës dhe mund t’i marrin njësoj si këtu pa pasur nevojë të presin ditën kur të vijnë në Shqipëri”, tha Rama.