Kryetari i Partisë Demokratike zhvilloi sot një bashkëbisedim me prodhuesit e bimëve mjekësore.

Gjatë fjalës së tij Berisha tha se “do të negociojmë për zero tarifa me Shtetet e Bashkuara të Amerikës”.

“Qëndrimi ynë ndaj tarifave është negociata me qeverinë e SHBA për zero tarifa. Ne do të vendosim zero tarifa me kërkesën që qeveria amerikane të na përgjigjet edhe ne me tarifat zero”, tha Berisha.

Berisha shtoi se “supozojmë se qeveria amerikane, për arsyet e veta, nuk e adapton këtë, ne do t’ju kompensojmë plotësisht tarifën e eksportit të vendosur nga vendet ku ju eksportoni”.

Kryetari i PD-së nënvizoi se “Shqipëria ka pasur dhe ka institucione në këtë sektor, por ne do fuqizojmë krahas studimeve për bimët frutore, bimët e arave, krahas studimeve për bimët arrore, bimët e tjera, ne do fuqizojmë shumë sektorin e studimeve të bimëve aromatike”.

“Do të angazhojmë ekspertizën shkencore më të mirë në këtë sektor. Kudo Shqipëria është me një pasuri të madhe natyrore në këto bimë”, tha Berisha,

Berisha nënvizoi se do të ofrohen “kredi të buta në të cilat qeveria do të mbulojë 80 për qind të interesit, do ofrohen për ju sipas sektorëve”.

“Ne duam ta bëjmë sektorin e bimëve eterovajore, ta shumëfishojmë në prodhim, në të ardhura, në punësim, në eksport”, u shpreh Berisha.

Berisha tha se do të do subvencionohet fuqishëm i gjithë procesi gjer në eksport.

“Prodhimet më të famshme tonat janë bimët aromatike dhe etero-vajore, më të pëlqyerat, më të preferuarat në tregjet ndërkombëtare. Kjo nënkupton që ne këtij sektori do i vëmë një rëndësi shumë të madhe. Do krijohen lehtësi të mëdha logjistike të grumbullimit të këtyre bimëve. Do krijohen lehtësi të mëdha për industrinë e përpunimit të tyre në vend”, tha Berisha.

Burimi ATSH