Gjithnjë e më shumë, të rinjtë po përfitojnë nga programi i vetëpunësimit, i krijuar t’u vijë në ndihmë të papunëve që kanë një ide biznesi.

Ky program ofron trajnime për sipërmarrjen dhe zhvillimin e planeve të biznesit, së bashku me grante për aplikantët e suksesshëm

Ministri për Ekonominë, Kulturën dhe Inovacionin, Blendi Gonxhja ndau sot historinë e një të riu, i cili ktheu zanatin në sipërmarrje të suksesshme, falë mbështetjes së programit.

“Hamdi Peqini, saldator me eksperiencë, ka krijuar biznesin e tij falë programit të vetëpunësimit. Pas shumë vitesh pune në terren, ai mori iniciativën ta kthejë zanatin në një sipërmarrje të suksesshme. Me mbështetjen e Zyrës së Punës, ndoqi trajnimet, mentorimin dhe krijoi planin e tij të biznesit. Sot, ai menaxhon me dinjitet biznesin e vet”, tha ministri.

“Nëse ke një profesion, mund ta kthesh në sipërmarrje”, është mesazhi i Hamdiut për të gjithë ata që kërkojnë një mundësi.

Aplikuesit kanë mundësinë të përfitojnë grantin e ngritjes së biznesit, që arrin deri në shumën e 500,000 lekëve. Po ashtu trajnim afatshkurtër dhe mentorim për të ndihmuar në krijimin e një plani të suksesshëm biznesi.

Të dhënat e INSTAT tregojnë se papunësia për të rinjtë shënoi ulje vjetore me 2,1 pikë përqindje. Papunësia për të rinjtë 15-29 vjeç është 19,1%, ndërsa për grupmoshën 30-64 vjeç është 7,3 %.