Në Europe House, studentët nga Kolegji i Evropës në Tiranë dhe Natolin u mblodhën për shkëmbimin e parë midis kampuseve, duke shënuar një moment historik në diskutimet e udhëhequra nga ta mbi zgjerimin e BE-së.

I organizuar nga vetë studentët, ky aktivitet mirëpriti Ambasadorin e Bashkimit Evropian në Tiranë, Silvio Gonzato dhe Profesoreshën Odeta Barbullushi, profesoreshë rezidente në kampusin e Tiranës, për një diskutim me temë “Momenti i ri për zgjerimin e BE-së: rruga drejt ribashkimit evropian?”

“Aderimi në BE nuk është vetëm një proces ekonomik, ai ka të bëjë me vlerat e përbashkëta, me anëtarësimin në një bashkim politik dhe ankorimin në shoqëri të reformave transformuese që i afrojnë ato me ribashkimin evropian. Shqipëria ka bërë hapa të rëndësishëm, veçanërisht në reformën në drejtësi, duke demonstruar vullnetin politik dhe angazhimin e nevojshëm për progres. Ruajtja e transparencës dhe gjithëpërfshirjes ndërkohë që përshpejtohen reformat do të jenë vendimtare ndërsa punojmë drejt një Evrope të bashkuar dhe më të fortë”, tha Ambasadori i BE-së Silvio Gonzato.

Përtej panelit, studentët patën mundësinë të shkëmbejnë mendime mbi vlerat e BE-së, rrugën e Shqipërisë drejt saj, dhe të ndajnë perspektivat e tyre për të ardhmen e zgjerimit.

Biseda vazhdoi me një debat dinamik, duke e bërë këtë një fillim tërheqës për agjendën e shkëmbimeve Natolin-Tiranë.

Burimi ATSH