Bashkëdrejtori ekzekutiv i Fondit Shqiptaro-Amerikan për Zhvillim, (AADF), Martin Mata theksoi sot rëndësinë e investimit në fushën e arsimit, si faktor kryesor në zhvillimin social dhe ekonomik të vendit.

Mata, në takimin e zhvilluar sot në Institutin “Harry Fultz”, në Tiranë, bëri të ditur se AADF ka angazhuar në fushën e arsimit një portofol prej 87 milionë dollarësh në mbi 37 projekte.

“Ne shpesh themi se nëse do të shikosh Shqipërinë e pas 20 viteve, shiko se si edukohen fëmijët sot. Ndaj dhe kemi zhvilluar një portofol. Numrat kanë rëndësinë e vet. Në rreth 140 milionë dollarë të angazhuara nga AADF, mbi 87 milionë dollarë janë angazhuar në fushën e arsimit. Mbi 37 projekte që kanë marrë jetë“, tha ai.

Mata renditi disa nga projektet që po zbatohen që nisin me laboratorët inteligjentë në shkolla, TUMO, Junior Achievement, Akademia e Kodimit, Shkolla e Drejtorëve, dhe që tashmë shkohet një hap më tej në segmentin universitar.

“Kishte mbetur ky segment i paplotësuar. Duke u përpjekur të gjejmë rolin tonë në këtë segment të jetës arsimore studentore në Shqipëri e filluam fillimisht duke dërguar studentë në SHBA, proces që vijon ende, por që ka kosto të lartë dhe numër të kufizuar studentësh që përfitojnë“, theksoi Mata.

Ndaj vuri në dukje ai, zhvilluam një program që është quajtur “Fondi Kombëtar i Bursave”, brenda AADF, për hapjen e një tjetër dere të madhe të formimit akademik e profesional, Institutit të Teknologjisë Rochester (RIT), i cili renditet ndër universitetet më të mira në SHBA.

“Vumë disa kushte që ne besojmë janë kolona themelore për të rritur cilësinë e arsimit në Shqipëri dhe ato kushte janë dhe do të mbeten që në Shqipëri të ketë mundësi të vijnë emra si RIT, të certifikuar, të njohur e listuar në universitet më të mira të botës”, u shpreh Mata.

Ai siguroi se AADF do të zhvillojë një proces konkurrues të shëndetshëm, ku me qindra studentë, në vitet që vijnë do të marrin deri në 70 % të bursës së tyre të mbuluar nga AADF.

“Është detyra, misioni ynë të sjellim në Shqipëri modele të tilla dhe të sigurohemi që çdo dollar që harxhohet sot në arsim, të kthehet mbrapsht deri në 10 herë në 20 vitet e ardhshme”, deklaroi ai.

Burimi ATSH