Kryeministri Edi Rama hodhi poshtë sot pretendimin e gazetarit dhe analistit politik të medias izraelite “Channel 12”, Amit Segal, sipas së cilit “administrata Trump është në negociata me qeverinë shqiptare për të pranuar në Shqipëri 100 mijë refugjatë nga Rripi i Gazës”.

Në një reagim në rrjetet sociale, Rama siguroi se kjo nuk është aspak e vërtetë.

“Nuk kam dëgjuar diçka kaq të rremë për një kohë të gjatë – dhe ka pasur shumë lajme të rreme kohët e fundit! Kjo nuk është aspak e vërtetë”, u shpreh Kryeministri.

Kryeministri shprehu respektin dhe solidaritetin e plotë për popullin e Gazës, i cili është dehumanizuar nga regjimi barbar i Hamasit dhe ka përjetuar një luftë ferri pas tmerrit mesjetar të 7 tetorit.

“Por le të jem i qartë: Shqipëria nuk është pyetur nga askush, dhe as mund të mendojmë për të marrë një përgjegjësi të tillë”, nënvizoi ai.

Kryeministri kujtoi se shtetin e Palestinës Shqipëria e ka njohur shumë kohë më parë.

“Jemi krenarë për miqësitë tona të forta me Izraelin, Emiratet e Bashkuara Arabe, Arabinë Saudite, Katarin, Kuvajtin dhe, natyrisht, popullin palestinez, shtetin e të cilit Shqipëria e ka njohur shumë kohë më parë. Por Shqipëria nuk ndodhet në Lindjen e Mesme dhe, nga zemra e Europës, nuk mund të bëjmë më shumë se çdo vend tjetër europian në një çështje të tillë. Megjithatë, ne dëshirojmë dhe lutemi që populli palestinez të ketë mundësinë të jetojë në shtetin e tij, si njerëz të lirë nën një regjim demokratik, dhe që Hamasit të mos i lejohet më të dëmtojë Izraelin – ose, mbi të gjitha, vetë palestinezët”, theksoi kryeministri Rama.