Turqia synon të ruajë marrëdhëniet e mira që gëzonte me Shtetet e Bashkuara të Amerikës gjatë presidencës së parë të Donald Trump – edhe në mandatin e tij të dytë, tha presidenti Recep Tayyip Erdogan në një konferencë për shtyp sot në Ankara.
“Shpresoj se miqësia ime me Trump do të vazhdojë”, tha Erdogan duke folur së bashku me kryeministrin sllovak Robert Fico përpara ceremonisë së betimit të Trump.
Presidenti turk ofroi gjithashtu mbështetjen e tij për gjetjen e një zgjidhjeje paqësore për luftën në Ukrainë.
Turqia, një anëtare e NATO-s, ruan marrëdhënie me Rusinë dhe Ukrainën dhe ka vepruar si ndërmjetëse në të kaluarën.
Donald Trump është betuar sot si president i SHBA-së në ndërtesën e Kapitolit, në Uashington.
Trump bëri betimin në një ceremoni madhështore ku morën pjesë familja e tij, ish-presidentë amerikanë dhe personalitete nga SHBA-ja dhe jashtë saj.
“Epoka e Artë e Amerikës fillon pikërisht tani”, tha ai në fjalimin e tij inaugurues.
