Bashkëdrejtori ekzekutiv i AADF-së, Martin Mata, deklaroi sot se Fondi Shqiptaro-Amerikan, ka investuar afro 35 milionë dollarë në 15 vitet e fundit për rijetësimin e qendrave të qyteteve në Shqipëri, përfshirë Piramidën në Tiranë dhe Tushemishtin, në Pogradec.

Në ceremoninë e nënshkrimit të marrëveshjes për rijetësimin e Lagjes Kala, në qytetin e Elbasanit, Mata tha se po të shikosh të gjitha qendrat ku është ndërhyrë, suksesi është te modeli i menaxhimit.

Kreu i AADF-së vuri në dukje se janë mbështetur mbi 1 mijë biznese në këto qendra ku është ndërhyrë dhe numërohen afro 20 milionë vizitorë në të gjitha qendrat e rijetësuara.

Ai theksoi se më shumë se AADF e qeveria së bashku, ka investuar sektori privat.

“Kur ka nisur ADF para 15 vitesh projektin e rivitalizimit falë një iniciative të qeverisë në atë kohë, ne nuk e dinim që më shumë rëndësi se lektë rëndësi kishte modeli i zhivllimit dhe menaxhimit. Më shumë se AADF e qeveria së bashku, ka investuar sektori privat”, tha ai.

E përbashkëta e të gjitha këtyre ndërhyrjeve, në Shkodër, Berat Krujë, Korçë, Vlorë, vijoi Mata, nuk ishte se u përmirësuan fasadat, por ishte se modeli i zhvillimit që garantonte se pasi të kishte mbaruar ndërhyrja, të bënte të mundur që komunitetet të merreshin me njëri-tjetrin, të organizoheshin dhe të krijonin një vlerë, e cila do të trashëgohej nga viti në vit e nga brezi në brez.

Mata tha se këto modele i gjen sot në SHBA, Gjermani, BM, deri në Afrikën e Jugut.

“Gjithë koncepti, filozofia është që mikromenaxhimi i përbashkët i komuniteteve dhe interesave të sjellë një energji të re, çlirim të tillë të burimeve financiare e njerëzore, që e kanë bërë sot Korçën një nga destinacionet më të kërkuara; Qendrën historike të Vlorës të konkurrojë denjësisht me të gjithë pjesën tjetër të qytetit, në të cilën është ndërhyrë; Apo Piramidën në Tiranë, qendrën më të vizituar”, tha Mataj.

Sipas tij, është bërë në këto qendra një kombinim ideal i historisë.

Mata theksoi rëndësinë e bashkëpunimit me pushtetin vendor.

“Kemi parë raste ku falë kryetarëve të bashkive ka ecur projekti, siç ka pasur raste që nuk ka ecur projekti për shkak të mosbashkëpunimit. T’i qëndrojmë afër njëri-tjetrit me plane pune agresive për të marrë edhe vëmendjen e donatorëve”, u shpreh Mata.

Burimi ATSH