Ministria e Arsimit dhe Sportit edhe gjatë vitit 2025 do të vijojë zhvillimin e reformave në arsim, me mbështetjen e arsimit bazë, të mesëm të lartë, orientimin e kurrikulave ndaj nevojave të tregut të punës dhe modernizimin e tyre.

Buxheti 2025 për MAS është në shifrën 62.02 miliardë lekë. Me buxhetin e 2025 do të ndërtohen ose rikonstruktohen rreth 70-80 objekte arsimore të arsimit bazë, me rreth 1000-1200 klasa/laboratorë, ku do të përfitojnë rreth 20 000 -25 000 nxënës dhe 1500-2000 punonjës mësimorë.

Deri në vitin 2027, 87% e nxënësve që mbarojnë arsimin bazë do të regjistrohen në një nga format/llojet e arsimit të mesëm.

Në buxhetin 2025 përfshihet ofrimi i teksteve shkollore falas për rreth 240 mijë nxënës që ndjekin arsimin bazë nga klasa e parë në klasën e nëntë, si dhe tekste shkollore falas për rreth 16 mijë nxënës nga shtresa sociale në nevojë në arsimin e mesëm të lartë.,

Buxheti 2025 do të garantojë ofrimin e bursave financiare apo kuotë ushqimore/financiare për 3800-4000 nxënës me nevoja të veçanta si dhe fëmijëve më me ndikim në uljen e braktisjes shkollore, të nxënësve të arsimit parauniversitar nga shtresat sociale në nevojë; hartimin e programeve specifike për arsimimin e grupeve të pafavorizuara.

Me këtë buxhet do të rritet numri i fëmijëve që ndjekin arsimin parashkollor, si dhe përfshirjen në klasat përgatitore në arsimin e detyrueshëm; reduktimin e numrit të klasave kolektive; sigurimin e shërbimit të transportit, si dhe mbulimin e shpenzimeve të transportit për rreth 33000 fëmijë dhe nxënës që kanë vendbanimin e tyre mbi 2 km nga shkolla, si dhe transportin për rreth 17300 mësues që punojnë mbi 5 km nga vendbanimi/qendra e përhershme e punës në shkollë.

Ndër prioritetet e tjera janë;

Fuqizimi i TIK-ut në arsim, nëpërmjet: hartimit të një platforme dhe plani kombëtar veprimi për zbatimin e TIK-ut në arsim si dhe krijimit të një infrastrukture të qëndrueshme, gjerësisht të përdorshme të burimeve digjitale në shkolla;

Përfshirja e gjuhës së huaj (gjuhës angleze) që në klasën e parë të arsimit fillor dhe nga klasa e tretë dy gjuhë të huaja, nga të cilat gjuha angleze si dhe një gjuhë tjetër e huaj me zgjedhje;

Rritja e fondeve grant për institucionet publike të arsimit të lartë “Pakti për Universitetet”, përmes financimit me përparësi për ngritjen e infrastrukturës dhe investimeve në kampuse universitare, garantimin e fondeve për mbështetjen studentore/bursat e studentëve nga shtresat sociale në nevojë, studentë që ndjekin degët në programet prioritare të përcaktuara me VKM si dhe studentëve ekselentë në IAL publike;

Financimi me bursa financiare në masën e pagës minimale të miratuar me VKM i studentëve ekselentë si dhe ato që studiojnë në programe të përcaktuara prioritet kombëtar, si dhe mbështetja e IAL-ve publike me fonde grant në kuadër të programeve të ndërkombëtarizimit; MAS do të mbështes hapjen e programeve të studimit në gjuhë angleze në të gjitha universitetet shqiptare.

Edukimi nëpërmjet sportit si një faktor efikas në përmirësimin e shëndetit e të mirëqenies për qytetarët përmes sigurimit të një shërbimi cilësor nëpërmjet sportit elitar dhe sportit në tërësi në institucionet arsimore duke kontribuar kësisoj dhe në forcimin e statusit të të rinjve shqiptarë në të gjitha fushat e jetës.

Me buxhetin 2025 do të rritet edhe numri i klasave të profilizuara sportive në mënyrë progresive në të gjithë vendin.

Burimi ATSH