Laboratori i sigurisë kibernetike është një hapësirë e avancuar për trajnimin dhe simulimin e kërcënimeve digjitale.

Kryeministri Edi Rama ndau sot mesazhin e Drejtuesit të Autoritetit Kombëtar të Sigurisë Kibernetike, Igli Tafa.

Përmes këtij laboratori Autoriteti Kombëtar për Sigurinë Kibernetike do të fuqizojë ekspertët e sigurisë kibernetike, duke ofruar trajnim intensiv në mbrojtjen ndaj sfidave që sjell teknologjia, dhe duke vendosur njëkohësisht standarde të reja për reagimin ndaj incidenteve të mundshme, shkroi Rama në rrjetet sociale.

Autoriteti Kombëtar i Sigurisë Kibernetike ka krijuar laboratorin e Sigurisë Kibernetike dhe njoftimi është bërë publik sot në rrjetet sociale. Një platformë e avancuar e trajtimit dhe simulimit të kërcënimeve digjitale.

Sipas postimit në rrjetet sociale, ky laborator është krijuar për të fuqizuar ekspertët e sigurisë kibernetike, duke ofruar trajnim intensiv në mbrojtjen e infrastrukturave kritike dhe përballjen me sfidat globale të teknologjisë.

Nga skenarë realistë te teknologji inovative si “Cyber Escape Room” dhe simulimet midis ekipeve “Red Team” dhe “Blue Team”, ky laborator vendos standarde të reja për reagimin ndaj incidenteve. Një hap revolucionar nga AKSK për forcimin e sigurisë kibernetike në Shqipëri dhe më gjerë!

Drejtuesi i AKSK-së, Igli Tafa u shpreh se qëllimi parësor i këtij laboratori, në kuadër edhe të digjitalizimit të Shqipërisë është përthithja e talenteve të reja.

“Më në fund, Shqipëria ka laboratorin e sigurisë kibernetike. Një laborator modern, i ngjashëm me laboratorët në vendet e zhvilluara të botës, si ato në SHBA, Izrael, Emiratet e Bashkuara Arabe, Singapori etj. Ky laborator do të shërbejë si një mjet trajnimi për ekspertët, e operatorëve publik dhe privat në fushën e sigurisë kibernetike.

Njëkohësisht, ky laborator do të jetë i hapur edhe për universitetet, shkollat profesionale, madje edhe shkollat e mesme. Qëllimi kryesor është përthithja e talenteve. Ne jemi një vend i vogël, ndaj kemi nevojë për ekspertë dhe talente në fushën e sigurisë kibernetike, falë hapit të madh dhe digjitalizimit që po bën Shqipëria.

Ky laborator është vendi i duhur ku do të bëhen trajnime praktike duke përdorur teknologji IT, OT, në të gjithë këtë gamë të gjerë”, tha Tafa.