Verdho bëri të ditur sot se “në vitin 2026 do të kemi trenin e parë elektrik në vend”.

Kreu i Hekurudhës Shqiptare, Ergys Verdho, tha se, “nisur nga ecuria e mirë e punimeve gjatë këtij viti, ku kanë përfunduar 80% e punimeve në gjurmën e re të linjës hekurudhore Tiranë-Rinas, pritshmëritë janë që në vitin 2026 të kemi në operim linjën e parë moderne hekurudhore në vendin tonë”.

Në një intervistë për mediet, Verdho bëri të ditur se, “në 2026 do të kemi trenin e parë elektrik në vend”.

Kreu hekurudhave tha se, “në janar ne nisim punën për ndërtimin e stacioneve hekurudhore dhe elektrifikimin e tyre, punime këto që do të mbarojnë brenda vitit”.

Gjithashtu informoi ai, këtë javë u hap dhe gara për rehabilitimi e linjës hekurudhorë Vorë-Hani i Hotit, pjesë e financimeve të BE-së.

“Ky është projekti më i madh infrastrukturor, 370 milionë euro kosto me një gjatësi 120 km. Ne presim që vitin që vjen të nisë puna konkrete për ndërtimin e tij”, deklaroi Verdho.

Kreu i hekurudhave shpjegoi edhe pse projekti Tiranë-Durrës-Rinas, është shoqëruar me vonesa.

“Në Forumin e Ballkanit Perëndimor, për financimin e shumë projekteve infrastrukturore, në 2015 mori nismën për linjat hekurudhore paneurpiane, ku lidhja e Shqipërisë me Korridorin VIII, që fillon nga Durrësi, Rrogozhina, Përenjasi, për të kaluar në Maqedoninë e Veriut deri në Detin e Zi, u bë shumë e kërkuar nga Europa. Gjithashtu dhe linja Vorë – Hani i Hotit që do të lidhi pjesën kufitare me Malin e Zi, janë projekte të rëndësishme dhe Ballkani është fokusuar te këto projekte dhe këto nisma kanë dhe burokracitë e tyre”, tha Verdho.

“Nismat që janë me financim të huaj, si në rastin konkret, kanë burokracitë e tyre. Fakti që Tiranë-Durrës-Rinas është i vonuar, nga njëra anë na mësoi shumë gjera. Vonesat që kemi hasur në këtë projekt nuk do t’i kemi te projekti më i madh infrastrukturor Vorë-Hani i Hotit. Linja Tiranë-Durrës-Rinas u nis që në 2015 dhe u konceptua që treni do operonte me naftë. Në 2019 u mor vendimi që projekti të rishikohet, pasi e gjithë linja do të elektrifikohej. Projekti u bë nga e para. Komponenti tjetër ishte ai i godinave të stacioneve. Ky komponent lidhej ngushtë me kontratën e parë, çka kërkoi një rishikim për të bërë lidhjen me sallat operative të stacioneve. Më pas efektet e pandemisë paralizuan gjithçka dhe frenuan financimet. Pas pandemisë kriza e çmimeve pati ndikimin e saj në rritjen e çmimeve për të gjitha produktet. Janë këto arsyet pse sot flasim ende për ndërtimin e linjës”, tha Verdho.

Ai theksoi se, transporti me tren është një nga transportet më me leverdi sa i përket kostove, sigurisë si dhe në mbrojtje të mjedisit.