Ministri i Shtetit për Pushtetin Vendor, Arbjan Mazniku deklaroi sot se bashkitë kanë përmirësuar ndjeshëm buxhetin e tyre, në krahasim me vitin 2014.

Mazniku, iu përgjigj deputetëve të opozitës në Parlament në lidhje me reformën territoriale të vitit 2015 dhe ndikimin që ajo ka pasur në buxhetin dhe të ardhurat e bashkive në Shqipëri.

Në përgjigje të deputetëve të opozitës, Mazniku tha se buxheti i këtij viti është 3 herë më i madh se ai i 363 bashkive dhe komunave të para reformës.

“Nga 13.1 miliardë lekë të ardhura që mblidhnin bashkitë në vitin 2014, ose 36 % të totalit të të ardhurave që ato shpenzonin, sot jemi në një nivel prej 34.9 miliardë lekësh. Pothuajse është trefishuar sasia e të ardhurave që bashkitë mbledhin. Kjo shumë përbën 51 % të totalit të shpenzimeve”, tha ministri Mazniku.

Nga ana tjetër, ai vuri në dukje se është dyfishuar edhe volumi i investimeve për frymë.

“Kemi qenë në një nivel prej 3 773 lekë investime për frymë, sot jemi në nivelin 6 724 lekë investime për frymë. Është dyfishuar volumi i investimeve për frymë“, u shpreh Mazniku.

Sipas tij, në 2014-ën shpenzimet për paga zinin 70 % të totalit të buxhetit. Sot, tha ai, zënë vetëm 43 % të buxhetit.

“Vetëm kjo e dhënë mjafton të tregojë për peshën që pagat mbajnë brenda totalit të buxhetit të bashkive. Nga ana tjetër ka bashki të cilat kanë nivelin më të ulët të shpenzimeve për paga, si Himara, Tirana dhe Kamza, ndërsa tri bashkitë që kanë shpenzimet më të larta për pagat janë Mirëdita, Fushë Arrëzi dhe Këlcyra”, deklaroi Mazniku.

Për sa i përket akuzave për rritje të numrit të punonjësve të emergjencave civile, Mazniku theksoi se numri është dyfishuar, por se është ende larg numrit të duhur.

“Kemi pasur 705 punonjës në strukturat e emergjencave civile dhe sot kemi 1 315. Nga njëra anë hidhen akuza se nuk iu përgjigjemi dot situatave të emergjencave civile, nga ana tjetër hidhen akuza për fryrje të strukturave. Po, për t’u përballur me emergjencat civile na duhen njerëzit, duhet të kemi numrin e duhur të njerëzve. Nuk jemi ende në standardin e duhur por jemi përmirësuar dyfish në raport me 10 vite më parë. Kemi pasur 110 mjete sot kemi 213 mjete për emergjencat civile”, u shpreh ai.

(ATSH)