Qeveria po ndërmerr një reformë të thellë në arsimin profesional.

Në një takim me sipërmarrjet, partnerët ndërkombëtarë, drejtuesit e shkollave profesionale dhe ekspertët e reformës së re të arsimit profesional, për “Arsimin Profesional Dual” dhe “Fondin Kombëtar të Aftësimit”, ku i pranishëm ishte edhe kryeministri Edi Rama, zëvendësministrja e Ekonomisë, Kulturës dhe Inovacionit, Olta Manjani bëri të ditur sot se në shtator të këtij viti do të nisë pilotimi i sistemit dual në arsimin professional.

“Sistemi dual parashikon që një pjesë të madhe të formimit të tij ta mbështesë te praktika. Nxënësi do të bëjë praktikën 3 ditë në ambientet e punës , në një biznes dhe dhe 2ditë në shkollë“, tha ajo.

5 profilet që do pilotohen në klasën e 12 nga shtatori i këtij viti janë kuzhina, multimedia, recepsioni, shërbimi elektroauto dhe instalimet në tensionin e ulët.

Ajo informoi se po testohet edhe një sistem pas të mesëm për menaxhimin e strukturave hoteliere.

“Sistemi dual do të pilotohet në 8 bashki dhe në 10 shkolla, ndërsa angazhohen 100 biznese”, deklaroi Manjani.

Zv/ministrja shpjegoi se janë disa aktorë që po bëjnë punë të jashtëzakonshme për të çuar para këtë process, ndërsa theksoi se biznesi është partneri kryesor në këtë sipërmarrje.

Manjani bëri të ditur se sistemi dual synohet që në 2025-ën të shtrihet në më shumë shkolla e bashki.

“Në shtator 2025, pas fazës së pilotimit, duam të shtrijmë sistemin dual duke përfshirë shkolla të reja dhe bashki të reja, ashtu si dhe profile të reja”, tha ajo.

Zëvendësministrja informoi se arsimi professional ka marrë një vëmendje të theksuar në vitet e fundit, teksa janë shtuar fondet për rikonstruksionin e konvikteve në të gjithë vendin që të sigurohemi që përfshihen nxënësit nga zonat rurale që nuk kanë një shkollë arsimi profesional pranë banesës së tyre.

Ajo shpjegoi se si do të funksionojë procesi.

“Qeveria do të sigurojë një kujdestar që do të ndjekë ecurinë e nxënësit, ashtu sikundër nga biznesi do të ketë një mentor. Do të duhet të caktohet një vend pune. Nuk do të ketë status nxënësi por nxënësi punonjës, që do të ketë të drejta të barabarta me çdo punonjës në kompani. Do të jetë në kompani 3 ditë në javë, 6 orë në ditë dhe do të ketë pagesë të referencuar me pagën minimale”, deklaroi ajo.

Manjani foli edhe rreth “Fondit Kombëtar të Aftësimit”, i cili do të jetë nga të ardhurat e biznesit për trajnimin e punonjsëve të vet kompanive apo edhe për palë të treat.

“Një përqindje e vogël e të ardhurave rreth 1 % do të shkojë për vet nevojat e biznesit të trajnim të punonjësve të vet kompanisë, punonjsëve të rinj apo për palë të treat”, tha ajo.

(Marrë nga ATSH)