Zhvillimi i parqeve dhe zonave për zhvillim teknologjik dhe ekonomik është një ndër prioritetet kryesore të Ministrisë së Ekonomisë, Kulturës dhe Inovacionit.

Në bashkëpunim me AIC si zhvillues publik, MEKI lançoi thirrjen e para për “DURANA Tech Park”, parkun e parë teknologjik në Shqipëri, vetëm pak javë pasi u prezantua parku “TEDA” në Kashar.

Në këtë takim me grupet e interesit, ishte e pranishme ministrja e Shtetit për Sipërmarrjen dhe Klimën e Biznesit, Delina Ibrahimaj, drejtoresha e AIC, Elira Kokona dhe zv. ministrat e Ekonomisë, Kulturës dhe Inovacionit, Endrit Yzeiraj dhe Sokol Duma.

““DURANA Tech Park”, është teknoparku i parë i cili do të jetë një hapësirë për inovacion dhe zhvillim teknologjik në Shqipëri, për kompanitë vendase dhe ndërkombëtare të Teknologjisë së Informacionit dhe Komunikimit”, tha ministrja Ibrahimaj.

Ky takim shërbeu si një thirrje drejtuar bizneseve, që ta përdorin këtë instrument në shërbim të nevojave të tyre për rritje ekonomike dhe konkurrueshmëri më të lartë.

Ministria thotë se lancimi i këtyre dy thirrjeve përbëjnë dy hapa historike për politikat tona qeveritare, dy zhvillime risi për ekonominë shqiptare, me dy zhvillues publik.

Ndërkohë sipas ministrisë, po vijojnë takimet me grupet e interesit për informim dhe orientim mbi këto mundësi.

“Me projekte të tilla, dhe të tjera që do pasojnë, synojmë të tërheqim investitorë, kapitale dhe njohuri në sektorët me inovator të ekonomisë. Vetëm kështu do mund të krijojmë vendet e punës cilësore të cilat kërkon dhe meriton tregu ynë i punës. Vetëm kështu mund ta transformojmë ekonominë shqiptare në mënyrë që të përballet denjësisht me konkurrencën e tregut të përbashkët evropian në të ardhmen e afërt”, shprehet MEKI.