Presidenca e Këshillit Evropian dhe Parlamenti Evropian kanë miratuar marrëveshjen e përkohshme, që i jep dritën jeshile Planit të Rritjes për Ballkanin Perëndimor.

Në një reagim në rrjete sociale, ministri i Ekonomisë, Kulturës dhe Inovacionit, Blendi Gonxhja, e cilësoi këtë lajm emocionues.

“Hapa të mëdhenj përpara në angazhimin e BE-së ndaj Ballkanit Perëndimor. Ky vendim shënon një moment historik në rrugëtimin e vendeve të Ballkanit drejt anëtarësimit në BE”, tha ai.

Gonxhja u shpreh se, marrëveshja parashikon një investim prej 6 miliardë eurosh nga BE, që do të nxisë rritjen ekonomike në të gjithë rajonin, për të kapërcyer hendekun në standardet e jetesës midis Ballkanit dhe BE-së.

Por sipas tij, ka edhe më shumë.

“Premtimi i BE-së për të përshpejtuar integrimin e vendeve të Ballkanit Perëndimor në Tregun Unik dhe mbështetja për forcimin e Tregut të Përbashkët Rajonal, hap rrugën për perspektivën e lëvizjes së lirë të mallrave, shërbimeve dhe forcës punëtore, nxitjes së tregut të përbashkët digjital, liberalizimit të transportit dhe integrimit në zinxhirët e furnizimit industrial”, u shpreh Gonxhja.

Ministri theksoi se, “kjo arritje nuk do të ishte e mundur pa përkushtimin dhe punën e palodhur të shumë agjencive dhe institucioneve publike. Ata meritojnë mirënjohjen tonë maksimale për realizimin e këtij momenti historik”.

(Marrë nga ATSH)