Alpinistët kroatë të bllokuar në majën e Jezercës janë shpëtuar pas një operacioni disaorësh nga Policia e Shtetit në bashkëpunim me Shërbimin e Urgjencës, Forcat e Armatosura dhe Repartin e Kërkim-Shpëtim të Republikës së Kosovës.

Lajmi u bë i ditur nga ministri i Brendshëm, Taulant Balla në një postim në rrjetet sociale, i cili theksoi se grupi i alpinistëve kishte hyrë nga territori i Malit të Zi dhe kishin mbetur të bllokuar në majën e Jezercës.

Balla informoi “pesë nga alpinistët kroatë të asistuar nga Shërbimi i Kërkim-Shpëtimit Malor të Kosovës, po kthehen tek e mjetet e tyre, në territorin e Malit të Zi. Ndërsa dy turistë të tjerë u transportuan me ndihmën e helikopterit në qytetin e Bajram-Currit”.

“Gjatë operacionit të kërkim-shpëtimit është bërë e mundur edhe nxjerrja e trupit të pajetë të një shtetaseje, e cila kishte humbur jetën si pasojë e rrëshqitjes në një zonë të thepisur dhe me borë”, tha Balla.

Shtetasja që ka humbur jetën është Z. L., 43 vjeçe. Për shkak të terrenit të thepisur malor, ka rrëshkitur nga një lartësi dhe për pasojë humbi jetën.