Deputetë të komisionit parlamentar të Ekonomisë dhe Financave u takuan sot me ambasadorin e Gjermanisë në Tiranë, Karl Bergner.

Kryetari i Komisionit, Eduard Shalsi bërit të ditur se gjatë takimit u bisedua mbi vijimin dhe thellimin e bashkëpunimit të gjithanshëm mes dy vendeve.

“Në rrugëtimin politik dhe proceset e rëndësishme demokratike që Shqipëria ka ndërmarrë, Gjermania ka qëndruar si një partner i jashtëzakonshëm dhe mik i besueshëm në krah të vendit tonë, e gjithashtu mbështetëse në rrugën drejt Bashkimit Evropian”, tha Shalsi.

Gjermania është një ndër partnerët më të rëndësishëm tregtarë për Shqipërinë. Prezenca e investimeve gjermane në vendin tonë ka pasur një trend rritës në vitet e fundit, ku në qershor 2023 stoku i investimeve gjermane rezultoi në 353 milionë euro.

Fluksi i investimeve direkte gjermane rezultoi në 91 milionë euro gjatë vitit 2022 dhe 34 milionë euro për periudhën janar-shtator 2023.

Sipas të dhënave të QKB-së, deri në mesin e vitit 2023 numëroheshin 375 biznese gjermane me status aktiv që operojnë në Shqipëri.